Bilbo
Tourreko taldeen aurkezpen ofiziala datorren ostegunean, ekainaren 29an, izango da, eta aurretikoan gehien espero den gertakarietako bat izango da. EITBk 200 herrialde ingururi emango die ekitaldia zuzenean.
Egun horretan bertan inauguratuko da Tourreko Fan Park-a, Areatzako parkearen inguruan, Bilbon. Gune irekia eta doakoa da, bizikleta giroan murgiltzeko: babesleak, opariak, tirolina erraldoi bat, herri kirolen erakustaldiak, euskal dantzak, bizikleten erakusketa edo horietan ibiltzen ikasteko pistak egongo dira. Gainera, pantaila erraldoi bat egongo da taldeen aurkezpena eta Tourraren inaugurazio jardunaldia jarraitzeko. Gune hori ekainaren 29 eta 30ean eta uztailaren 1ean egongo da zabalik.
Donostia
Donostiak ere Euskadiko hasierako etapen jarduerez gozatuko du. Ekainaren 26tik abuztuaren 6ra Bizikleta. 150 urte erakusketaz gozatu ahal izango da, San Telmo museoan. Hori bizikletaren bilakaera, Euskadin fabrikatutako markak, erabilera eta lanbide ezberdinei eskainitako bizikletak eta kirol mailan mugarri desberdinetako protagonista izan diren batzuk ikusteko aukera ematen duten pieza historikoen erakusketa da. Gainera, Miramar Jauregian Kirol-diplomaziaren erronkak eta aukerak XXI. mendean udako ikastaroa egingo da ekainaren 28an eta 29an.
Gasteiz
Bicycle Summit Euskadi 2023 ekainaren 30ean egingo da, Vital Fundazioa Kulturunean, eta hirietako bizikleta-mugikortasuneko nazioarteko aditu onenetako asko bilduko ditu, beren esperientziak eta egungo joera aitzindariak partekatzeko.
Uztailean, halaber, Probintzia Plazan sei kubo egongo dira, Araba, txapeldunen lurraldea izenburupean, lurralde horretako txirrindularitzaren irudi esanguratsuenetako batzuk erakutsiko dituztenak.
Amorebieta-Etxano
Frantziako Tourra Euskadin erakusketak 125 pieza erakutsiko ditu ekainean eta uztaileko lehen egunetan, bi erakusketatan banatuta, gai ezberdinekin: euskal txirrindularitzaren historia eta Frantziako lasterketa handiaren berezkoa.
