Vitoria-Gasteiz

Hirigune historikoan has zaitezke, Gasteizko historian zeharreko paseo izugarri bat egingo baituzu. Plaza politak, kantoiak eta eliza gotikoak ikusteko aukera izango duzu. Jauregi errenazentista dotoreak ikusiko dituzu; besteak beste, Goiuri, Montehermoso, Eskoriatza-Eskibel eta Bendaña jauregiak. Azken horretan, Arkeologia Museoa eta Fournier Karta Museoa daude, munduko karta-bilduma onenarekin.

Andre Maria Zuriaren plazan geldiune bat egin ondoren, gomendatzen dizugu bisita gidatu bat egitea: ordu eta erdi irauten ditu, eta hiriaren eta haren historiaren gaineko ikuspegi orokor bat emango dizu. Ez egin zalantzarik, eta zoaz turismo-bulegora, ibilbideen eta erreserben berri izateko.

Santa Maria katedrala bisitatzea ere aholkatzen dugu. Han egindako zaharberritze-lanek zenbait idazle inspiratu zituzten; batzuk aipatzearren, Ken Follet, Pablo Coelho eta Toti Martinez de Lezea. Eta hiriko harresian (XI. mendekoa) hiriaren ibilbidea gordetzen da harri ederren artean: Gasteiz izeneko herrixka bat izatetik gaur arterainokoa.

Gastronomia da Gasteizko beste alderdi erakargarrietako bat, artea sukaldaritza baita hemen. Baduzu non aukeratu: menu ugari, pintxoen ibilbidea eta Euskadiko jatetxe nabarmenenetako batzuetako kartak.

Eta zer dago hoberik eta osasungarriagorik eguna pasealdi eder batekin osatzea baino. Floridako parkea bisitatu eta Senda ibilbidean jarraitzea da aukeretako bat. Hiru kilometroko oinezko-gune bat da, zuhaitz ugarikoa, eta hainbat parke eta jauregitxo ditu inguruan. Armentiako basilika erromanikoraino jarraitzen du ibilbideak; zoragarria da hango ataria.

Vitoria-Gasteiz argazki galeria

Dena ikusi

Gasteizi buruzko artikulu interesgarriak

Vitoria-gasteiz Direktorioa

Ikusi gehiago